長津湖 长津湖 The Battle at Lake Changjin 影評【廣東話】中共 党100週年史詩式世紀級招兵洗腦爛片 插爆電影編劇、邏輯、製作 侮辱英雄 篡改歷史 朝鮮戰爭 冰雕連 蛋炒飯

先旨聲明：要插《長津湖》嘅地方多到爆！我主要就唔喺「本片是否符合歷史」的角度論，因為預咗佢歪曲歷史，我只係針對本片嘅編劇、故事和邏輯嚟評論。 美國🇺🇸係有嘢平過大陸🇨🇳，就係電影成本！《長津湖》同《尚氣》一樣，都係 2 億美金，但視覺同特技效果就差天共地！就算兩集《戰狼》都拍得好過「党100週年電影」，不是什麼世紀級大製作！美術與打燈風格落後、CG 動畫仲粗糙過2015 /17年嘅《戰狼》！雪景場面色彩太多，啲色可調得灰白暗蒙一點，來傳達大風雪「好凍、好凍」的感覺，好簡單的調色就可以處理到，好簡單嘅顏色學！《戰狼》有好多實景，反而《長津湖》好多畫鏡。以前《Gone With The Wind》、《十誡》、《埃及妖后》 哩啲4、5、60年代嘅荷李活電影，就話因為技術限制而要用畫境代替實境，但背景既是人手所畫，以假亂真、呃到好多代人。今日《長津湖》嘅畫境係用現成的電子圖 key上去，慳水慳力！構圖單薄、比例又唔啱。好幾場戰機群的距離太近，有些少駕車經驗的人都會覺得奇怪。《長津湖》完全cap水！不過帳面可能灌水、充大頭鬼也說不定！ 開場講到吳京飾演嘅主角伍千里打完仗後回家，應該是「國共內戰」，佢同屋企講到政府給佢哋2畝幾地，又可以起屋、又可以威水俾啲鄉里睇。咁如果當時個個都有政府俾地，咁又唔係特別威啫！有政府俾地你起屋就好威？咁你只係炫富，心態好似有點錯誤！政府俾地你所以佢好好、值得你上沙場為國捐軀？乜唔係認同佢建國理念、覺得值得捍衛先去打仗㗎咩？其他國家招兵，係用福利而唔係生活基本需要嚟交換，你唔駛一定要當兵先滿足到生活基本需要。基本生活條件變成理想，其實都係黨用食飯、住屋嚟要脅你去打仗，偷換概念，教壞細路！所以中共人嘅理想就係食、瞓、屙同威威！ 15/16 分鐘鏡頭轉移到北京中南海，毛澤東就出兵嘅事開會。部下報告，劈頭就講美軍登陸仁川，講到好似係美軍單方面大舉侵略大陸土地咁樣，冇交代成個韓戰嘅背景——（美軍係應聯合國要求出兵，所以大陸出兵就以「人民志願軍」嘅名義，去迴避「解放軍對抗聯合國」嘅說法，因為「解放軍」係「正義之師」，無理由解放「聯合國」捍衛嘅國家，所以叫「人民志願軍」。你睇下幾狗吖毛澤東！其實係冇人志願，甚至上咗火車都不知道去哪裏和做什麼；中共將大批國共內戰嘅國民黨戰俘推上沙場做炮灰。算啦，佢扭曲事實預咗嘎啦！又聲稱美國空軍13隊「將」登陸台灣，又提及美國違反1950年1月5日就台灣的立場，其實係扭曲杜魯門總統嘅聲明，用「台灣議題」來焫㷫小粉紅觀眾。以「美軍🇺🇸單方面入侵」過於簡單嘅橋段，好「單細胞式」交代開戰嘅原因！ 毛澤東話「尊嚴，只在戰場上發生」，又話：「打得一拳開、免得百拳來」。所以呢，大陸人嘅尊嚴就係食、瞓、屙同威威！美帝咁「逼害大陸」，跟著韓戰又殺咁多中國人，咁大陸 79 年同美爹勾結建交，中共咪係PK漢奸先？ 伍千里個細佬伍萬里，由易烊千玺飾演，香港人可能比較陌生，佢個樣成個陳同佳咁款！佢係一個年輕少艾、入世未深嘅村童，終日遊手好閒、撩事生非，搖身一變上戰場經歷戰火、親眼目睹朋友戰死、血漿淺面、非常痛恨美國鬼，仲要親手殺人；但係同時佢又好想被哥哥睇得起、好追求所謂「英雄」同「軍人嘅榮耀」。要成為當時所認可嘅「囯家英雄」，要殺夠20個美軍！佢係拋石能手，喺佢一出場同電影尾段佢都有拋石嘅場面，用嘅係右手；但係中段講到佢同一個美軍生死肉搏嘅關頭，佢要開鎗殺人，竟然係用左手。開過鎗嘅人都知，開鎗係要用你擅長用嘅手先可以應付到鎗嘅衝力。伍萬里哩個後生仔嘅角色，係要來 appeal to 中小學生，俾佢哋身份認同，由一個冇用嘅村童變成囯家英雄，所以本片係有好濃厚洗腦目的、鼓吹年輕人盲目仇美。長期喺哩類流行文化作品嘅薰陶下，周圍接收到「反美」意識，真係會俾年輕人錯亂嘅世界觀！ 故事話兩兄弟被編到同一個連隊，其實 make 唔 make sense 嘅呢？因為正常軍隊編制係唔會咁安排。一來，若他們部隊遇到轟炸，一家就同時死 2 人。二來，咁樣係會影響軍人喺戰場上嘅決策，有感情牽扯同顧慮、大細眧，大大提高作戰嘅死亡率同置戰友於極高風險下。如果講佢哋喺唔同連隊、然後打到後期兩連變一連、或者講兩連合作，咁就 make sense 啲！ # 有一幕戰後兩兄弟傾計，哥哥問細佬點解要唔服從命令跑返嚟搵自己，萬里好難為情話：「因爲你是我哥」，嘩！賣 sweet！販賣親情呢，大陸不嬲都行哩套；但係原來細佬返轉頭救阿哥係「擅自離隊、違背軍令」，仲要累成支隊伍企喺半路等佢，阻礙行動，不但做唔到親情可貴，而且仲係話私人利益係大過公眾嘅！ 人物互動錯亂，伍千里將細佬交俾胡軍演嘅雷睢生（雷公）去管，而雷公係帶大哥百里同二哥千里初上戰陣嘅老隊長，即使官階唔夠千里高，但始終都是兩個哥哥的師傅，萬里應該對佢恭恭敬敬，話晒都係軍隊場合。但係萬里同雷公嘅互動冇大冇細，萬里會整蠱佢啊、嘈醒佢起身，以下犯上、毫無體統，如果喺正常軍隊，起碼被罰跑圈同冇飯食！ 全套戲只有胡軍演得比較好，雖然劇情狗屁不通，但胡軍嘅演技尚可將佢個角色演得較有說服力和立體感，其他角色都好唔紮實、虛有「英偉」嘅外殼、冇靈魂，吳京啲表情傾向浮誇；眾多角色之中只有雷公先可以表露真實、軟弱、傷痕累累嘅一面，雷公都可能都賺到啲熱淚，其他角色就 afford 唔到 vulnerable，因為角色設計本來就十分脆弱！ 神化毛岸英，我哋都預咗架啦！最近大家都提起佢點死嘅！（其實唔刪po咪冇人傳囉！）相傳佢喺前線發少爺脾氣要食「蛋炒飯」，生火被美軍發現地點而炸死。真係抵死！當然哩度佢嘅出現同死亡都會被「最大利益化」！靚仔、謙厚、愛民如子的。毛岸英上前線派乾淨衫、被、慰問傷兵。伍萬里喺佢面前問另一個士兵：「殺幾多個美國鬼先叫『英雄』？」個士兵答：20 個。毛岸英竟然答：「上了戰場就係英雄。」佢哩度想表達囯家好明白事理，「只要你上戰場，國家就認可你係英雄」！想引人上戰場都唔駛咁，將「英雄」殊榮嘅要求降到咁低，侮辱歷史一般對「英雄」嘅定義，即係好似美國左膠嗰啲「participation trophy」咁，整到 cheap 曬！ （山頂反光鏡。） 到「Allan Maclean 上校之死」嗰幕，Maclean 心口中鎗奄奄一息，伍萬里見到 Maclean 苟延殘喘想開鎗射死佢，因為佢爭8個就湊夠20個美國鬼子。但係竟然喺哩刻，千里叫佢唔好開鎗，話：「有些槍必要開，有些槍可以不開。」有沒搞錯！喺戰爭嘅場合、敵人臨死嘅時候，你竟然同我賣「人道」？（即係嗰啲植物人瞓好耐，唔知佢醒唔醒得翻諗要唔要掹喉咁，但係喺某囯度梗係掹啦！）通常喺決戰片，輸嗰方受咗致命一擊，面對死神臨近和打敗嘅恥辱，咩尊嚴都冇曬，而且好辛苦；贏咗嗰個面對敵人嘅垂死煎熬都好難頂，礙於戰士嘅精神，通常都會送對方上路縮短雙方嘅痛苦！你竟然喺度賣「慷慨」、「仁慈」同「人道」？你送他去醫院救嗎？虛偽到極！喂，好似係伍千里射到佢垂危先，你真係唔慌唔人道啦！ 哩套《長津湖》講 low tech 簡陋裝備嘅「志願軍」對抗宇宙最強、船堅炮利嘅美軍「刀仔gur 大樹🌳」嘅神話，好多我哋平時喺現實生活中見到嘅中共奸狗嘢、其實可以喺度使出來、「孫子有曰：兵不厭詐」！厚面皮、歪理、超限戰術、以最小嘅付出博取最大利益去打美軍，喺打仗嘅場合就最有正當性、唔會俾人話你狗賊，將故事講得合理一點；而且還顯得共軍有點頭腦、謀略，但係套戲竟然喺哩度賣光明正大、賣乖、硬橋硬馬！ 有個角色話：打仗完後要返屋企教女兒算術！嘩！時代有點錯亂！美國左膠穿越時空發生！就算香港嘅七十年代，屋企唔夠資源供子女讀書，都會取捨俾兒子，50 年代嘅大陸應該未識玩左膠！ 好啦！終於到咗全片最出名嗰幕「冰雕連」，雖然話係名場面，但係做得認真瘌西！我哋知道共軍冇禦寒衣物監生凍死，但係既然佢改咗咁多歷史，唔爭在幫「冰雕連」加埋戰略意義，話係士兵死守重點剛位、唔郁得之類，給個好聽嘅解釋佢吖嘛！哩一幕講美軍屎滾屁流撤軍，喺雪地經過一列凍僵咗嘅士兵，啲美軍唔似打輸，啲衫都冇穿冇爛。海軍陸戰隊少將 Oliver Smith 就對冰雕連敬禮，講咗句「Fighting against men with such strong will like this, we were not ordained to win.」即係「同哩啲咁有決心嘅軍人戰鬥，我哋註定贏唔到佢哋！」嗱！小粉紅聽到就「濕曬」！唔知歷史有冇哩句啦，但係我肯定，買飛入場坐 3 粒鐘嘅人，就為咗聽個美國白人用英文讚凍死咗嘅士兵，咩票價都值回啦！精神戰勝鬼佬！其實係毛澤東監生凍死佢哋，而唔係咩意志同決心！認真諷刺！短短2分半就處理咗「冰雕連」一幕！我諗我講哩幕分分鐘，多過 2 分半！ 這套片，香港大導演徐克有份。究竟徐克收幾多錢？真係冇人知！分分鍾徐克嘅參與可能係 minimal，然後買佢個名搭上去㗎啫！唔知啦！但係如果佢有參與，仲衰！拍啲咁嘅爛片！真係晚節不保，個朵都臭晒！齋賣名又好、有參與又好，徐克都係仆街架啦！ 啲鬼佬，都唔知佢究竟知唔知個劇本，竟然幫敵人做戲踩自己，真係賣國賊！唔知佢哋收幾多錢拍哩啲賣國片啦？最近因為套戲，有好多報告都話打過韓戰嘅美軍都覺得自己係「殺人狂」，點解佢哋有哩個感覺？因為美中兩者軍力太懸殊，美軍冇諗過大陸啲兵係冇武器，要去前面死咗嘅屍體拾鎗。研究哩套片就會明白一二，齋睇陣容，共軍又點可以打贏美軍？個故事根本講唔通！呃細路！如果唔係共產黨用人海戰術、源源不絕將士兵送死，根本場仗係冇得打！ 我一路睇、一路搖頭，覺得唉！中國人真係慘！以前俾人逼冇得食、去打仗，依家啲細路仔俾人逼洗腦、食生麵粉、生薯仔，真係好慘！ 總括嚟講，哩套《長津湖》係挑戰你白癡嘅程度，超級爛片！要有好白癡嘅觀眾智商、有好白癡嘅敵人（美軍）同好白癡嘅老細（😏），先拍得成！Very Uninspiring！不過，只要你老細係中共，咩題材、幾好嘅劇本都會搞到爛晒架啦！ 多謝大家收睇三上同你哋分享嘅《長津湖》影評！希望大家 like、comment、share、subscribe「美港天下」嘅 channel 同瀏覽我哋嘅 ebay store 啦！bye-bye！